居然在最最重要的關頭，情緒混亂之間，唔記得帶 heart rate monitor。沒法子，唯有靠感受身體的感覺同埋手上應急用的2:00完賽每km Pacing紙(每5km目標時間28:26)。

1-5 Km: 一如既往，一開始大家都跑得好快，我不停告訴自己一開始唔好急，唔好急，一急就後段知痛苦了。基本上，從運動場跑到工業區，都係一路跑一路俾其它人過頭，但我一直留意住路程牌，每km我都在目標時間之內，咁就不刻意加速了。最記得有個行頭打扮十足的先生，我光看他全身的裝備，唔計手機，其它穿在身上的至少都過萬元。仲有一個全身黑衣的跑姿怪怪的大隻佬先生，估佢應該跑唔完，咁大隻負擔應該唔少。(分段時間:00:27:04)

6-10 km: 工業區到西灣橋往澳門方向，印象中從金都到馬場果段路，路面好黑，跑得好小心，一仆街成年的心機就白費，因為Galaxy唔會為我準備多次馬拉松的，機會就只有一次了。沿路見到應該係迷你馬拉松的跑手在馬場對開跑，這段路我仍然是一路俾人狂過頭，行頭先生係我面前150m左右，見到佢背著2個小水樽又幾包energy gel，手臂又有手機，又帽又太陽眼鏡咩都有，唔覺得重ge咩，而黑衣大隻佬係我前面連影都唔見埋，真係勁。係10 km果個路標，我看看手錶上的總時間是00:55:08，唔通隻錶壞左，再聽聽身體給我的回饋，沒氣喘，開始加點力吧!我要在2個鐘完成佢。(分段時間:00:28:03)

11-15 km: 每次一見到有水站，我會停下來喝水，因為跑住飲我試過好多次”俗”親。從觀水塔往科學館果段路，對面線係回程的半馬跑者在跑，感覺上這段路在跑步的人特別多，自己跑起來也特別來勁。我見到前面有對內地的夫妻在跑，看似妻子好像開始慢下來，先生就跟著也慢來，同佢老婆講”加油”，仲俾埋手姿支持佢老婆，看來他們的感情一定好好，能夠一起跑馬真的很了不起。可能是這段路很多跑手在跑，速度大家都在提高，折返點跑回橋那段路仍在陸續有人過我頭，不是很爽。回程我仲見到舊同學高佬edmond，行頭先生仍在視線範圍，黑衣大隻佬仍然消失中。(分段時間:00:26:05)

15-20 km: 今年好像沒太多人玩cosplay，我係直至西灣橋上才見到對面線有個綠衣勁揪俠，看來他應該幾難2個半鐘完成到。可能係之前果個分斷跑得太high了，上橋時終於還返俾佢，我上橋時大概都行左50米，這個還不打緊，最慘仲係落橋時拉拉到左腳小腿，每次一想用力就抽抽地，我心諗前段時間造得咁好，臨尾香我實喊都似。唯有放慢再放慢速度完成埋下面的路程，過剩3km多一點吧!在17km處我終於過左行頭先生了，而在18km處也見到這前無影黑衣大隻佬，佢果時跑得好慢，看來是爆了。(分段時間:00:27:34)

20 km – 終點: 已經唔想再諗太多，有幾多用埋佢。入運動場我第一時間看看大會的大鐘時間，02:23:xx，減返半個鐘我應該係2個鐘之內了，真的有點唔相信自己會跑到。呵呵……開心死啦! (個人完成時間:01:54:47)


過終點後，開心影相。仲癲到坐09:30船過香港，行足一日，看來”醣原負荷法”之前幫我存左好多能量，也許如果唔係唔記得帶個heart rate monitor, 也許如果唔係拉一拉左小腿，也許……。想太多了。01:54:47係我賽前想都沒想過的一個好時間，看來心情會好一陣子了。